خلينا نتفق من الأول: أنا مش مبرمج.

أنا ابن محتوى. بلّشت أصمم مواقع بوكالة صفا سنة 2014، وقدت فريق الإعلام الجديد بقناة فضائية، ودرّبت ناس ببلدين. كل هاد قبل ما أكتب أول برومبت لـ Claude.

اليوم بختصر اللي كان ياخد أسابيع لساعات. والفرق مش بالأداة، الفرق إني بعرف شو بدي منها.

أربع محطات، ودرس من كل وحدة

2014 لـ 2016 · وكالة صفا · مصمم ومطوّر مواقع. أول مواقع ووردبريس بنيتها بإيدي، وأول سيرفر وقع بين إيدي بنص الليل. من هون تعلمت إنه السيرفر مش وحش، بس بدو حدا يفهمه.

2016 لـ 2019 · قناة القدس الفضائية · رئيس فريق الإعلام الجديد. قدت فريق سوشال ميديا لقناة بتبث على مدار الساعة. الدرس: الخبر لازم يوصل قبل ما يبرد، والفريق لازم يشتغل بنظام، مش بمزاج.

2021 لـ 2023 · المركز الأوروبي وقدس برس · مدرّب معتمد ومنتج محتوى. درّبت ناس بفلسطين والسودان، وبنفس الوقت كنت أنتج محتوى لوكالة قدس برس للأنباء. اكتشفت إني بحب أشرح أكثر ما بحب أعمل.

2026 هلّق · العمل الحر والماجستير · مسوّق رقمي وصانع أنظمة. زووم موبايل، تاج مول، مطعم أحمد علي، والأمانة العامة للقرآن الكريم وجمعية بصائر بالكويت. وبالآخر ماجستير تسويق إلكتروني من جامعة طلال أبو غزالة.

المشروع اللي ما حدا شافه، مش موجود. هيك بفكّر بكل شغلة بعملها: إذا ما وصلت للناس، كأنها ما صارت.

شو بشتغل هلّق

01 · الأكاديمية: كورس «احترف كلود». 13 وحدة، 80 درس، و4 مشاريع حقيقية من الصفر للإطلاق.

02 · العملاء: أنظمة تسويق للشركات. إدارة صفحات، إعلانات، بوتات، ومواقع بتشتغل على سيرفرك.

03 · المختبر: غرفة أخبار بذكاء محلي. نماذج مفتوحة على سيرفر خاص، بدون اشتراكات، لأخبار فلسطين.